طلب اعارة

على باب سفارة أمريكا

لمحت ابليس و ف ايده استماره

بقول له على فين؟

قاللي بص

يا هجره يا اعاره

يا عم زهقت كفرت

الاقيش معاك سيجاره؟

انا انتهيت خلاص

لا نافع وسواس ولا خناس

ولا ليا عيش وسط الناس

انتوا عالم مجرمين

عندكوا فائض ف الفساد

في كل البلاد

ومش محتاجين شياطين

مليش عيش ف البلد دي

بقالي سنين عاطل

و انتوا بتعرفوا

تقلبوا الحق باطل

و تسلكوا القاتل

و تمشوا ف جنازة المقتول

ومفيش مشاكل

يا عم ده انا بقيت أوسوس بالمقلوب

و أقول للحرامي كفايه بقى توب

انت هاتعمل كل الذنوب لوحدك

و أنا ابليس

أشتغل واعظ

ولا كمساري ف اتوبيس

يا عم ده انا زمان

كنت استنى حد ينسى

يسمي

وهو بياكل لقمته

دلوقتي كل اكلكم ملوث

و بصراحه الواحد خايف على صحته

ده مفيش ضمير اساسا

عشان اموته

وكل واحد بمزاجه

خربانه ذمته

يا عم ده كل حاجه اتسرقت

وكده الاجيال الجديده

م الحراميه اتظلمت

يا راجل ده من كتر ما لطشت معايا

خرجت ف مظاهره

مع الناس اللي بتقول كفايه



ابليس قال كلمته
ابليس عايز سيجاره
قصدى
ابليس طالب اعاره